拜仁主場收科攞尾彩

猪拉多纳

16/12/2011
文： 蘇斯黑柴

德甲首循環最後一輪，今晚先演拜仁慕尼黑主場鬥科隆，拜仁上輪險勝史特加被批評極度窩囊，球隊上下矢志要喺2011年主場最後一役攞番個尾彩，科隆實力同近況都曳，「讓球主客和」拜仁讓兩球都冇有怕，照捧1.85倍「讓球主勝」。（有線61及201台周六凌晨3時30分直播）


拜仁上仗作客對史特加，喺落後一球下反超前二比一、兼對手踢少一人下，教練軒歷基斯比賽末段先後換走湯馬士梅拿、列貝利同洛賓三大主力，搞到險象環生，最後冇畀史特加扳平已算萬幸，軒帥因此被譏諷換人失當，攞咗三分都要一肚氣。

列貝利矢志吐烏氣

不過黑柴要為軒帥解畫，皆因當日列貝利小腿有傷，而洛賓同湯馬士梅拿亦感冒剛愈，換走佢哋係有理由，不過佢哋嘅傷病問題經過一周調整後已經好番晒，列貝利更矢志要喺今仗打破連串宿命，皆因自安聯球場落成以來，拜仁主場對科隆五場聯賽竟然四和一負未贏過，列貝利加盟拜仁後五戰科隆，仲要冇入波冇助攻，堂堂「拜仁國王」呢啖氣點啃得落，何況佢喺法國足球先生選舉四甲不入，連上月拜仁最佳球員都輸埋畀卻奧斯，今場擺明車馬要攞尾彩。

傳舒麥加任科隆會長

「科隆王子」普多斯基近期大爆發，近六場聯賽狂入八球，喺射手榜以十四球位列次席，直追十五球嘅「拜仁射手王」馬里奧高美斯，今場兩大射手對決甚有睇頭，中位數3.5球嘅入球大亦可一捧。不過科隆近期明顯只踢普多斯基一個，中後場球員狀態甚差，三日前聯賽補賽主場對緬恩斯竟然全場捱打，大部分時間過唔到半場，完場前至靠王子救番幸保不敗，雖然有傳一級方程式「車神」舒麥加可能成為下任會長，但未必可以冲喜，今晚作客安聯球場面對實力同決心都超強嘅拜仁，相信唔會咁好彩咯。