烏甸尼斯1.48倍W咪嫌熱

猪拉多纳

15/12/2011
文： 朱楓

今晚歐霸盃I組上演煞科戰，由意甲烏甸尼斯主場鬥蘇超班霸些路迪。烏甸今場攞1分就夠出線，相反些路迪今場焗攻，形勢已經好不利，最慘仲患有「作客恐意症」，咁嘅情況，朱楓決定熱捧1.48倍主W！（有線61及201周五凌晨4:05直播）




目前烏甸尼斯喺歐霸盃I組以8分排第2，領先些路迪3分，今仗只要唔輸，就肯定出線，相反些路迪一定要贏波，先可憑對賽優勢力壓烏甸晉級32強。


歐霸盃分組賽主場醒


烏甸尼斯今季喺意甲超勁，暫時僅以得失球唔及祖記排第2，但其實喺歐霸盃成績都唔曳，經常出副選都試過主場贏馬體會2:0，加上以往4次喺歐霸盃（連歐協盃）分組賽主場出擊錄得全勝，預計今場就算有後衞貝拿迪亞啱啱遇車禍受傷肯定缺陣，贏面仍然好大。




因為錫安違規、臨時殺入歐霸盃分組賽嘅些路迪，喺今屆賽事勁有陪太子讀書味道，打咗5場先得1勝2和2負，雖話今場贏波可以後上出線，但朱楓真係唔覺呢支蘇超勁旅喺最後一輪可以突圍而出。




事關佢哋近年喺歐洲賽作客戰績極曳，今屆歐霸盃附加賽次回合因錫安出違規球員，結果判些路迪作客贏3:0一仗，竟然係些路迪近9場歐洲賽作客唯一勝仗，加上史上作客意大利球會只得2和6負；早前主場對雷恩因有球迷唱禁歌，啱啱被歐洲足協罰款1.5萬歐元，但些路迪都表明唔會作上訴，睇得出佢哋似乎好想快啲離開呢個歐霸盃傷心地，專注番蘇超本土賽，你話仲點捧得落？