南球盃決賽次回合 智大 利大射手鬥入波

猪拉多纳

14/12/2011
文： 走肖

南美球會盃決賽次回合終極戰聽朝上演，智利大學喺主場對利加大學，一於玩入球大。雖然首回合智利大學領先1:0，但由於利加大學形勢上未玩完，兩隊又分別有伊度亞度華加斯同巴高斯爭做神射手，入球騷應該開得出。（有線61、201及廣東體育周四早上8:15直播）

兩軍箭頭爭做神射手

首先提醒大家，決賽唔計作客入球。智利大學首回合憑伊度亞度華加斯入波領先，現時佢以9球領先射手榜，假如呢場再發威，隨時可以離開智利去歐洲掘金，當然唔會放軟手腳。唔好忘記，伊度亞度華加斯得22歲，最近佢當選做2011年智利足球先生，又入圍2011年南美足球先生候選名單，為錢途梗要搏啦。


對家利加大學首回合受傷兵問題困擾，連高原主場都撐唔住要輸波，不過利加大學唔少傷兵已好番，今場可以用完整得多嘅陣容爭取入球。更重要嘅係，巴高斯暫時喺今屆賽事攻入7球，有機會同伊度亞度華加斯爭做神射手，話晒佢都踢過貝爾格萊德紅星，照計唔希望喺厄瓜多爾屈成世，有火入波唔難。