柏雷素爾有大志

猪拉多纳

08/12/2011
文： 蘇豪

2011年世界冠軍球會盃揭幕戰將於今日黃昏Kick off，東道主日本代表柏雷素爾於豐田球場迎戰大洋洲冠軍奧克蘭，日職神奇球隊柏雷素爾奪冠後士氣高昂，主帥尼仙奴雄心萬丈，連巴塞隆拿都唔放在眼內，豪言要稱霸世冠盃，今次對住奧克蘭有殺冇賠，大勝可期，捧大！（有線61及201台周四晚6時45分直播）




柏雷素爾今季爆冷奪取日職冠軍，主帥尼仙奴功不可沒，呢位巴西籍教頭用人不重名氣，而且會因應唔同對手調整人腳。根據統計數字顯示，柏軍今季三十四周聯賽總共派出廿七套不同陣容，效果理想，被日本傳媒形容為「尼仙奴魔法」。尼仙奴季尾並冇踢殘主力「士哥拿」田中順也，反而安排佢同小將工藤壯人及老牌前鋒北島秀朗輪住上陣，結果成功撐到最後封王，部署一流。


尼仙奴無懼巴塞山度士


柏雷素爾今次首度參與世冠盃，有機會面對歐洲王者巴塞隆拿及南美勁旅山度士等強手，雖然佔有地利，但仍然被各界睇死。不過，尼仙奴對大軍信心十足，豪言唔怕任何對手：「我哋一直都希望喺世界球壇揚名，今次唔單止要參與世冠盃，仲會以冠軍為目標！」老牌前鋒北島秀朗同樣表明想贏世冠盃，首戰對住弱旅奧克蘭必定想大數對手增強氣勢，主勝偏熱唔抵玩，捧大！