盧卡斯長抖 勵志感言冧fans

猪拉多纳

05/12/2011


利物浦中場盧卡斯，加盟紅軍後一直被利迷嫌唔夠班，但佢努力不懈愈踢愈進步，到今季大熟大勇，早前兩鬥車路士，以及聯賽對曼城都打出超水準，令球迷刮目相看。但盧卡斯極唔好彩，上仗對車仔整傷十字韌帶，今季要提早收咧，不過盧卡斯冇自暴自棄，一番勵志言論令利迷，連隊友都非常感動。


2千球迷祝福


自上季起，盧卡斯已成紅軍鐵打主力，本季佢更有球星風範，早前更壓倒曼聯及曼城一眾球星，榮膺2011年英格蘭西北足球先生。但重創後盧卡斯冇自怨自艾：「依家受重傷的確遺憾，但他日我復出之時，無論生理及心理上都肯定變得更強，因為放棄並非我性格。我會以最好表現回饋球迷，未來會一直以穿起紅軍戰衣為榮。」盧卡斯咁忠心，難怪成利迷寵兒，於佢受傷廿四小時內，就有超過二千球迷於官網內對佢作出祝福。




盧卡斯：「依家受重傷的確遺憾，但他日我復出之時，無論生理及心理上都肯定變得更強，因為放棄並非我性格。我會以最好表現回饋球迷，未來會一直以穿起紅軍戰衣為榮。」