阿祖要活得比你好

猪拉多纳

04/12/2011
文： 麥馬拿仁

受傷野獸永遠都最危險，點解？因為唔認衰囉，強者心靈受創就會作出絕地反擊，狠狠咁反咬對手！哥連泰斯「左腳重炮王」阿祖安奴上月失戀，名模Luana嫌佢冇上進心將佢狠撇，唔襟激嘅「阿祖」即極度搶韁，今晚巴甲煞科哥連泰斯主場鬥彭美拉斯，佢話明要「士哥」助球隊贏波封王威番鋪！（周一凌晨3時開賽）




2000年「阿祖」於法林明高成名，佢隻「黃金左腳」出名屈機，世界球壇對佢驚為天人，多位森巴名宿都覺得佢係明日之星，巴西未來十年都靠晒佢。不過佢因為私生活唔檢點，成日掛住溝女泡夜店，加上又傷患纏身，成就只屬一般，喺國際賽最叻都只攞個美洲國家盃。舊年佢曾重返意甲踢羅馬，但混吉咗唔夠一年就被放棄。




本季加盟哥連泰斯，一向恃才傲物嘅阿祖同名模Luana熱戀，但佢係「無腳雀仔」，日日都掛住落bar劈酒，身邊女伴氹氹轉，Luana頂唔順，到上月就同佢分手。本身分手都冇問題，但Luana話佢唔上進，淨係掛住玩就辣着「阿祖」。


鬥彭美拉斯要入波攞彩


你咁講吖嘛，我就威畀你睇，前一輪主場對明尼路，「阿祖」就轟入奠勝球。阿祖安奴難得發憤，根本冇嘢擋倒佢，今次主場鬥冇嘢爭嘅彭美拉斯，客軍主帥史高拉利出名錫阿祖安奴，主隊可贏波封王，阿祖安奴要「活得比你好」，攞咗冠軍仲驚冇女？