紐卡素史命必達

猪拉多纳

03/12/2011
文： 樂比堅尼

今晚英超頭場紐卡素主場對車路士。車路士近期陷入前所未有嘅信心危機，球員輸到慌，領隊保亞斯喺更衣室亦失去公信力，昔日黃金戰車已淪為錢七，保亞斯揸唔實個軚盤，隨時車毀人亡，呢個時候對住狀態弗爆、主場未輸過嘅紐卡素注定冇運行，加上「喜鵲」有史必在天之靈庇佑，樂比仔捧受讓嘅紐卡素「讓球主勝」。（有線200及300台周六晚8時45分直播）




車路士嘅問題喺邊，相信好多人都講得出，籠統啲講係青黃不接，倚賴多年嘅軸心杜奧巴、林柏特及泰利已無復當年勇，但佢哋始終係功勳球員，初來甫到嘅領隊保亞斯為保球隊和諧，決定以不變應萬變，但事實證明車路士已去到必須大換血地步，保亞斯只能寄望明年一月前唔好輸得太多，有機會增兵買人，車仔先有機會翻身！


車路士防線信唔過


好多人覺得車路士進攻呆板，冇默契冇隊形唔在講，突破同創造能力都欠奉，不過車仔死穴係防線極大漏洞，大衞雷斯、泰利甚至艾殊利高爾及施治頻頻犯錯，攞牌次數竟然冠絕英超，可見佢哋後防幾咁進退失據，要以超技術犯規補鑊。




紐卡素今季成績係近年最好一季，目前排名仲高過車仔，成季加埋僅輸過一次，連曼聯、阿仙奴及熱刺等勁旅都贏唔到「喜鵲」，實在諗唔到狀態低沉嘅車路士點贏佢哋。雖然紐卡素今仗有迪奧迪倦勤，約拿斯古迪利斯停賽，不過紐卡素今季嘅成功係靠整體努力換番嚟，以現時球員爛打作風及高昂士氣，樂比仔相信車仔好難贏佢哋。




另外，今場係史必過身後，紐卡素首場賽事，由於這位球會前名將深得「喜鵲」球迷愛戴，球員都希望以勝仗慰史必在天之靈，決心有保證，周中列斯聯（史必母會）作客四比○大勝森林正是最佳例子。


兩軍近10次交手成績


球季 賽事 戰果

10/11 英超 車2:2

英超 紐1:1

英聯盃 車3:4

08/09 英超 紐0:2

英超 車0:0

07/08 英超 紐0:2

英超 車2:1

06/07 英超 紐0:0

英聯盃 紐0:1

英超 車1:0