熱刺副選雪到硬 PAOK「+1」有冷味

猪拉多纳

30/11/2011
文： 麥馬拿仁

歐霸盃A組賽事，熱刺主場鬥希臘PAOK。熱刺本季英超谷、盃賽縮，搵二、三線兵敷衍歐霸，預料柏夫里約真高、積基李華摩亞等非主力將續擔大旗，戰力戰意均一般。PAOK作客OK，和過魯賓卡山唔嘢小，撐「讓球客勝」！（有線61及201台周四凌晨4時05分直播）


去季熱刺取得英超第五名，與本屆歐聯資格擦身而過，當時領隊夏利列納已話到明球會唔想踢歐霸盃。夏利叔冇講大話，今季擺到明搵後備踢歐霸，莫迪歷、加利夫巴利、柏加等大將全部留番聯賽先用。雖然柏夫里約真高、艾朗連儂、辛度雲尼亞里、靴里奴高美斯實力都唔曳，但一來雪到硬，二來球會都唔稀罕呢隻盃，熱刺戰意有幾高，請自行判斷。

PAOK客戰有料到

睇番積分榜，現時熱刺、魯賓卡山同得七分，均落後PAOK一分，而熱刺因對賽成績較曳排第三，今仗係小組最後一場主場比賽，有人會一廂情願以為熱刺將出較多正選爭勝。但其實熱刺最後一場係對弱旅沙姆洛克流浪，而魯賓卡山就作客強敵PAOK，故今戰就算熱刺贏唔到，亦仲有晉級機會。


PAOK係希臘勁旅，小組開打至今演出Sharp醒，兩場作客都四平八穩硬淨到暈，九月去到魯賓卡山地獄主場，雖一度落後一比二，但最後都逼和對手；之前造訪沙姆洛克流浪，半場就贏夠三粒奠下勝基。雖然今仗有鋒將維連夏缺陣，但其餘眾將難得對戰熱刺，都想藉此良機證明自己，「讓球客勝」有2.78倍分頭博得過！

魯賓卡山「大」作戰

同組另一戰俄羅斯魯賓卡山主場對愛爾蘭沙姆洛克流浪，客軍小組四戰盡墨失十一球已出局，但魯賓卡山主W冇肉食，「讓球主客和」又讓到兩球惡搞。「沙流」四戰三仗入到波，其中兩戰總入球去到4球，今場大細中位數去到3.5球照捧大。