車路士復仇夫添「保」帥

猪拉多纳

29/11/2011
文： 力奇

個幾星期前先喺英超輸畀利物浦，今晚車路士再喺聯賽盃8強重遇呢隊「剋星」，力奇有信心車仔可以報仇，事關車仔唔只有多一日休息時間，紅軍領隊杜格利殊仲要响賽前放聲氣話會出副選當應酬，最緊要係車仔主帥保亞斯要為飯碗而戰，1.7倍主W穩陣。（now638台周三凌晨3:45直播）




車仔近年畀紅軍恰死，近10次交手都未贏過，假如單計迎戰由杜格利殊兩度帶隊嘅紅軍，車仔更加係11次交手不勝。鋪鋪見「紅」，要打破宿命當然唔易，好彩車仔勝在兵力雄厚，就算主帥保亞斯講明話會輪換，正選陣容都仲有林柏特、費蘭度托利斯同馬隆達等擔正，同夫添冇乜分別，強陣加主場，點都有優勢。


保亞斯要向阿布交差


再者，車路士家陣喺英超形勢不利，錄得阿布拉莫域入主後最差成績，班波想話唔搏聯賽盃都唔得，新帥保亞斯絕對急於求成績當交代。球員鬥志足，加埋前仗先輸完，谷埋一肚火，今鋪自然係有仇報仇啦！




紅軍呢邊，正式比賽連續10場未輸過，狀態唔曳，不過領隊杜格利殊之前講過，話唔滿意足總安排賽期太過頻密，要佢哋喺聯賽鬥完車仔、曼城，抖唔夠48小時再喺聯賽盃鍊「車」，就發老脾話今仗會出副選，兼夾叫球迷咪買飛入場。


傳利物浦4.9億撬韋拿


姑勿論杜帥講完算唔算數，始終球員唔係鐵打，3日踢2場點都要輪換，但考慮到佢哋後備兵源冇咁充足，今仗預計落場會係馬田基利、史比寧等新仔，最巴閉嘅射手安祖卡路爾，腳風又唔順，莫講話要作客史丹福橋再偷雞，就算想延續對賽不敗走勢都好難。難怪葡萄牙《球報》尋日爆料，利物浦有意掟4,000萬鎊（約4.9億港元）出嚟，收購入咗冷宮嘅巴塞射手韋拿，加強板櫈深度啦！