史雲斯返地頭做大「士」

猪拉多纳

27/11/2011
文： Katie

近排上親討論區，梗見到網友討論「三叔」兩部大熱手機S2同Note，不過唔知點解家陣啲後生仔乜都彈一餐，S2就話食電，Note就話大部冇美感，老實講邊有嘢係完美o架？又要樣靚又要身材正，揀手機好似揀老婆咁，港男真係難服侍！




Katie呢排工作壓力大躁底咗少少，希望大家唔好介意，但講到度波，小妹絕對唔會受情緒影響，今晚英超史雲斯對阿士東維拉，我就睇好主場出擊嘅「天鵝」喇，史雲斯小讓平半，捧1.95倍上盤啦！




成名於維拉嘅勞基摩亞家陣効力史雲斯，昔日佢同老死艾邦拉荷合作無間，當然對好兄弟嘅踢法有透徹了解，賽前佢就向史雲斯嘅後防隊友過晒料，有信心可以封殺呢位維拉首席射手喎，睇怕艾邦拉荷今晚想搵到食都幾難。


維拉近5仗勁失12球


事實上，咪以為史雲斯係新升班就好蝦，佢哋今季英超主場6戰獲3勝2和1負，上仗輸畀曼聯亦只係僅輸0:1，不敗率逾8成，硬淨到爆。「天鵝」賽前收到好消息，就係好波之人祖阿倫傷愈復出，有佢搭住史葛冼佳亞同尼敦戴亞策動攻勢，箭頭丹尼格拉咸邊使愁冇供應吖？




對家維拉近5場聯賽有4場失分之餘，今季6場英超作客賽事又未開齋，大營氣氛同士氣真係麻麻。況且中場靈魂兼隊長柏杜夫因為腿筋受傷上陣成疑，近5仗仲勁失12球添，今晚造訪史雲斯唔似有運行。


微博傳情 \(^O^)/


「你，你的真摰使我沒疲累……」呢隻廣告歌相信大家都耳熟能詳，但唱呢句歌詞嗰位靚仔係邊個你哋又知唔知吖？佢叫做Henry，係Indie樂隊Ignite the Hope（ITH）（右圖）嘅主音，Katie本身好支持本地音樂，所以上星期佢哋出Show，小妹都有化行妝去撐場。

好多人都以為ITH隻隻歌都嗌破喉嚨鬧來鬧去，查實呢個只係謬誤，佢哋啲歌唔單止好聽，仲好有意思，真係非一般嘅勁Band。ITH首隻大碟《The Realization of Universal Truth》已經面世，Katie係就係買咗，但如果Henry可以幫我簽個名就好咯！

Katie推介：史雲斯（上盤）

外國長大，半個鬼妹仔，自細因爸爸成日帶朋友返屋企睇波而愛上足球，鍾意睇靚仔但唔會盲目追捧，最緊要係好波。