柏斯托尼國家打吡做英雄

猪拉多纳

27/11/2011
文： 笛子波童

近年大部分出色嘅法國球員都選擇出國搵食，搞到法甲近年吸引力大減，不過隨着卡塔爾投資公司今年入主巴黎聖日耳門，將呢間首都球會打造成「法甲曼城」，終於令到呢個被人輕視嘅聯賽重新受到關注。聖日耳門今季咁多名新兵當中，阿根廷新星柏斯托尼肯定最受矚目，呢名破法甲最高轉會費紀錄嘅中場，周一凌晨將會帶兵出戰國家打吡作客鬥馬賽，誓言要以入球征服對手，以勝者姿態穿越凱旋門。（now 631周一凌晨4時直播）




由於前季國家打吡曾出現球迷騷亂，引致球迷、警察受傷事件，法國足總為咗唔想刺激雙方球迷嘅敵對情緒，上季開始已經禁止作客球迷入場觀看國家打吡。雖然今次聖日耳門同樣冇球迷隨隊打氣，不過柏斯托尼並不擔心：「只要你睇過我哋今季嘅作客演出，就知道主客對我哋嚟講根本冇分別，只要球隊有實力，去到邊度一樣可以贏波。」




事實上，聖日耳門今季聯賽兩次輸波都喺主場，作客反而保持六戰不敗，柏斯托尼承認球隊喺冇球迷壓力之下會踢得更放：「能夠喺主場球迷面前比賽當然係好事，不過有時球迷期望會為球員帶來一定壓力，呢點可解釋到球隊今季作客表現比主場更佳。」柏斯托尼今季聯賽射入六球，當中三球來自作客賽事，有佢入波嘅比賽球隊都能保持不敗，佢嘅演出好壞絕對同球隊成績掛鈎。


馬賽立立亂士氣差


馬賽今季分心歐聯出閘脫腳，要到第七輪聯賽才取得本季首捷，目前落後榜首聖日耳門十二分，想保持爭標希望今仗不容有失。可惜球隊因為歐聯搞到元氣大傷，上周中主場更以○比一不敵希臘球隊奧林比亞高斯，士氣、信心再受打擊。據報前鋒基格納因與教練迪甘斯鬧不和已被貶落預備組，球隊現時備受內憂外患，主場面對宿敵根本冇必勝把握，聖日耳門有得受讓必捧「讓球客勝」。


近五季聯賽對賽往績


球季 成績




10/11 馬賽主勝2:1

10/11 聖日耳門主勝2:1

09/10 聖日耳門主負0:3

09/10 馬賽主勝1:0

08/09 聖日耳門主負1:3

08/09 馬賽主負2:4

07/08 馬賽主勝2:1

07/08 聖日耳門主和1:1

06/07 馬賽主和1:1

06/07 聖日耳門主負1:3