飛燕諾擦私房菜華域克

猪拉多纳

27/11/2011
文： ComboKing

今日阿King睇中三場荷蘭波，其中荷甲飛燕諾作客小讓華域克平半，上盤可捧。飛燕諾本季有名帥朗奴高文領軍，攻守實力都大有改善，上仗作客贈維迪斯四蛋，信心完全返晒嚟，鬥「私房菜」華域克，勝望極濃。（周日晚7時30分開賽）




飛燕諾上季曾作客吞燕豪芬十蛋，最後僅以第十名過終點，今季球隊力圖改革，搵嚟朗奴高文領軍。呢位荷蘭名將教過賓菲加、阿積士、燕豪芬、華倫西亞等大會，雖成績唔算太標青，但經驗豐富，絕對有力帶飛軍走出低谷，本季頭七戰就取得五勝二和。早前連敗三仗後，飛軍上仗以大勝止血，已重拾信心；而球隊對上三次鬥華域克取得全勝佳績，今場讓得起平半。


海牙作客曳讓唔起


另一場荷甲海牙作客精英隊，海牙實力雖稍為秤先，不過本季演出遠遜上季，而且近四作客全部輸晒，今戰讓唔起精英隊，捧「讓球主勝」。最後串埋場荷乙，施禾利作客伊高斯，客軍本季靠強勁攻力高踞榜首，而伊高斯主場五連勝狀態一流，今仗雙方必大打進攻足球，大盤可高度留意。