昆士柏鬥心強嗒得杯「諾」

猪拉多纳

26/11/2011
文： 江忠德

英超三支升班球隊喺季初大放異彩，家陣全部排喺中游位置，講到實力，昆士柏流浪就屬於優質股，有條件繼續力爭上游，今晚作客諾域治隨時帶嚟驚喜！




由於有條大水喉射住，昆士柏今季增兵專向高質素嘅失意軍人埋手，好似祖爾巴頓、胡禮菲臘斯等都仲想威畀人睇，論鬥心一定強，而且經過季初磨合後默契改善、隊形漸見，上輪仲作客砌低喺主場素有「巨人殺手」之稱嘅史篤城，成班球員信心大增。




另邊廂嘅諾域治踢法粗枝大葉，實在冇乜嘢亮點，只係一味死纏難打，欺善怕惡，畀佢哋恰到嘅保頓、新特蘭同史雲斯，全部都係中下游球隊，遇到稍為強嘅對手就冇晒符，況且依家嘅昆士柏流浪陣容比起上季英冠強好多，邊有咁容易應付！


利物浦 曼城駁火


至於周日重頭戲非利物浦鬥曼城莫屬，「紅軍」今季唔使踢歐洲賽冇咩顧慮，今晚可以集中火力攻「城」，一於有前冇後打死罷就！至於喺歐聯凍過水嘅曼城，睇怕亦只有集中精神喺英超發威，呢場唔攻仲有乜嘢好做！大家齊齊搞「大」佢益球迷。