皇馬狂鋒衝冧馬體會

猪拉多纳

26/11/2011
文： 亨格比利

今晚西甲上演馬德里打吡戰，由皇家馬德里主場迎戰馬德里體育會，話明係打吡戰就一定會打甩髀啦，加上西班牙人濃厚嘅地區色彩，肉緊到輸波好似輸命一樣，所以大家今晚真係要坐定定睇「打仗」！「亨利」今場決定信名牌，撐皇馬大炒贏波捧1.42倍「讓球主勝」！（now632台周日凌晨3:00直播）


皇馬三箭齊發威力勁


皇馬今季真係勢不可當，連埋周中歐聯贏波，各項賽事夾埋已經12連勝，咁靚走勢前線「三叉戟」C朗、賓施馬同希古恩真係功不可沒。今季西甲皇馬到現時為止已經入咗42球，唔計C朗，齋計賓施馬同希古恩兩個，加埋入嘅波已經係西甲大部分球隊依家嘅總入球數，要知道佢兩個並唔係必然正選，有咁嘅入球量認真得人驚！




本來「亨利」都好戥慣常只用單箭頭嘅皇馬教頭莫連奴頭痕，手上咁多弗嘅前鋒，都唔知點揀好，點知賽前西班牙嗰邊嘅傳媒就話，莫帥今場會大解放，變陣放晒C朗、賓施馬同希古恩三大神兵一齊落場搏殺，相信唔止「亨利」，好多球迷都會十分期待。


法卡奧九成唔踢得


事實上「亨利」一直好欣賞賓施馬，仲記得今季開鑼前，好多消息都話佢因為放棄咗自己，搞到太肥整躁咗莫帥，話佢喺銀河艦隊時日無多，點知後尾隨住法國球壇Icon施丹加入皇馬管理層，喺多方面不斷落藥之後，賓施馬先可以「返番嚟」，季前眼尾都唔望吓佢嘅莫連奴，依家態度已經180度轉變，實在可喜可賀。




雖然作客嘅馬體會都係同樣粒粒星，但計配搭同卡士，始終唔係皇馬嗰皮，前鋒法卡奧復操冇耐又話唔掂，幾乎肯定唔使預佢，今場就算幾想贏幾搏命都好，睇怕都係難逃一敗。其實「亨利」都戥佢班後防慘，面對擺出全攻型陣式嘅皇馬，誇張啲講，同等輸根本冇分別啦！


橫數千軍


皇馬12連勝勁入波

‧12連勝，有7場入4球或以上。

‧史上交手獲80勝31和35負。

馬體會連開6場大

‧近8場4勝1和3負連開6場大。

‧近12年交手不勝。