加柏無限升呢再剋科隆

猪拉多纳

25/11/2011
文： 蘇斯黑柴

德甲獨腳戲上演萊茵河打吡，科隆主場鬥慕遜加柏。慕遜加柏今季進步神速，上仗大炒雲達不來梅弗到爆燈，加上對賽往績一面倒佔優，作客可勝殘陣嘅科隆。慕遜加柏小讓平半，上盤係黑柴誠意推介。（有線61及201台周六凌晨3時30分直播）




慕遜加柏瑞士籍主帥法夫爾已經成為黑柴新偶像，佢上季喺球隊包尾時接手，好快就將一條德甲最爛防線徹底改造，帶領球隊奇迹護級，今季表現更進一步，長居前列甚至曾處榜首，雖然較早前因箭頭迪甘馬高同波巴迪拿等因傷缺陣，一度陷入三戰僅得一分嘅小低潮，但聰明嘅法夫爾將中場馬高列奧斯移前任第二前鋒，球隊即時反彈，仲造就該新星喺近三仗共入七球，成為德甲新風頭躉。




事實上，當各界對慕遜加柏季初表現感到心滿意足時候，法夫爾依然自強不息，近期喺做好防守基礎後，進攻方面仲不斷突破，上仗五球大炒不來梅，法夫爾賽後話球隊仲有進步空間，黑柴相信佢哋嘅真正潛力仍然被低估。


上季雙殺加埋贏9:1


科隆上輪聯賽主場對緬恩斯因為球證拉法迪賽前企圖自殺而改期，今場守將安達仙奴、謝姆、中場阿曼度比堤、捷希同箭頭路華高域因傷缺陣，中堅軒歷基沙蘭奴同中場硬漢蘭歷雙雙停賽，陣容嚴重不整，加上近五次打吡戰對慕遜加柏兩和三負未贏過，上季兩循環主場先慘吞四蛋，作客亦輸到一比五，擺明格食格，今仗相信都凶多吉少。