南韓U23搏甩髀 炒卡塔爾出氣

猪拉多纳

23/11/2011
文： 九叔

冤家路窄！南韓U23今日响奧運亞洲區外圍賽A組作客卡塔爾U23，簡直係月初亞冠盃決賽翻版，因為雙方都有艾薩德同全北球員，仇人見面韓國仔實打甩髀，客W抵玩。（now671台周四凌晨0:00直播）


其實南韓班人抱住好強嘅報復心態，事關除咗亞冠盃全北汽車失落錦標，早個星期成年國家隊居然作客黎巴嫩輸波，連續兩次衰响中東佬手上，乜面都冇晒，所以韓國球圈都好希望U23生生性性贏番鋪。

兩軍各有亞冠決賽球員

計人腳，南韓同卡塔爾一樣出唔到夫添，孫弘民、池東沅、南泰熙、具滋哲同寄誠庸幾個適齡外流球員都冇歸隊，只能夠用清一色土炮遠征多哈，不過好似全北中場新星徐訂普、濟州後衞洪正好、慶南大腦尹比加林質素唔曳，有本錢鋤低卡塔爾。況且南韓U23嘅備戰做得好足，今個月4號就响南海同昌原集訓，到17號就轉到坡州國家足球中心再谷多輪，又派咗體能教練池田正剛去睇卡塔爾U23對伊拉克U23場友賽，摸清對手底細，可以話應該做嘅都做晒，就睇班細路爭唔爭氣嘞。


卡塔爾有唔少名門球員，龍門柏薩特、前鋒哈辛、安沙利都係出自艾薩德，但佢哋今年表現麻麻，近6次主場只贏過科威特，其餘5場輸晒，南韓U23有權贏番鋪，洗雪「中東耻辱」(o架)。