佩奧爾撥火揚言做低伊巴謙

猪拉多纳

23/11/2011

仇人見面，分外眼紅？AC前鋒伊巴謙莫域舊年暑假同巴塞反面走人，仲同哥迪奧拿講明會「見鑊打鑊」，不過今晚兩軍對碰前夕，伊巴謙竟反口話只會盡力比賽。唔理佢係出口術定堅笠水，巴塞隊長佩奧爾就率先辣火頭，豪言今晚要好好教訓伊巴謙喎！


伊巴謙莫域之前公開插哥迪奧拿唔係男人，仲話自己喺効力巴塞期間奈佢唔何，但一旦離開巴塞，第時肯定會打鑊哥帥。今次二人狹路相逢，一向寸爆嘅伊巴謙竟然縮沙：「對前東家嘅感覺梗係有多少特別，但講到底，我哋冇私人恩怨，根本唔使大肆渲染！」唔打哥帥啫，咁會唔會向曾經同佢傳出不和嘅美斯郁手呢？


答案要踢完場波先知，但係巴塞大佬佩奧爾，就率先開腔唔信伊巴謙咁順攤：「伊巴謙莫域今場嘅鬥志肯定格外高昂，不過我更加肯定嘅，係我哋成班巴塞球員都想做低佢同AC，決心比伊巴謙更強。」