伊巴謙搏命復仇 巴塞讓唔起AC

猪拉多纳

23/11/2011
文： 力奇

歐聯H組今晚上演超重量級大戰，由AC米蘭喺聖西路主場迎戰巴塞隆拿。兩班波雖然經已穩奪出線資格，但仲要為首名而戰，巴塞今仗防線大執位，默契不足或成漏洞，更何況AC有歐戰王、誓要倒戈復仇嘅伊巴謙莫域壓陣，巴塞作客讓半一？我寧願揀1.87倍下盤好過！（有線61、201及中央5台周四凌晨3:45直播）


「夢3」巴塞隆拿近年橫掃歐洲球壇，近3屆2奪歐聯冠軍，連老牌勁旅AC都要行埋一邊。不過，實力高唔代表贏梗。事實上，巴塞首循環喺魯營出擊，結果都只係同AC踢成2:2平手，未分高低(o架)。再者，巴塞目前以4戰得10分排榜首，以2分之微壓住AC，考慮到巴塞最後一輪係返主場鬥弱旅巴迪，變相即係只要今仗和波，佢哋個首名出線位已經十拿九穩啦！

巴塞防線執位默契曳

鬥志成疑問，巴塞另一隱憂係傷兵唔少。中場發電機恩尼斯達因傷缺陣，都仲話有足夠替補，但兩邊翼衞丹尼爾停賽，艾迪安奴養傷，結果條防線就變成佩奧爾移去右閘，艾比度踢左閘，中堅就搵馬斯真蘭奴拍住碧基，要知道呢個防線組合喺今季未出現過，默契不足有危機(o架)。

AC柏圖做秘密武器

AC呢邊，雖然前鋒卡斯辛奴同中場奇雲保定養傷，但射手柏圖及時傷愈，上周末聯賽對費倫踢咗20分鐘，會係今場秘密武器，事關上次喺魯營交手，就係「鴨仔」開波閃電攻破巴塞大門。至於「復仇者」伊巴謙莫域喺首循環一戰未有上陣倒戈，今次終於有機會向「仇人」哥迪奧拿同美斯示威，肯定會搏埋條老命踢爭氣波，要攻破巴塞條臨時防線，絕對綽綽有餘。要AC保住不敗開下盤，有幾難先？