米蘭雙雄爭簽泰維斯

猪拉多纳

23/11/2011

卡斯辛奴做完心臟手術之後，復出遙遙無期，AC米蘭助教哥斯達古達就透露，球隊在明年一月肯定會入貨補充鋒力，而最理想人選非「野獸」泰維斯莫屬。

底價2500萬鎊

泰維斯自罷踢一事同曼城鬧不和，最近又「升級」擅自離隊留在阿根廷，搞到咁僵基本上都好難再披天藍戰衣，而曼城日前亦表態願意賣走呢位「麻煩友」，但價錢唔會低過2,500萬鎊。


正所謂人棄我取，AC米蘭已經打算在一月將「野獸」收歸旗下，哥斯達古達透露AC米蘭觀察完多個目標後，發覺最合適人選都係泰維斯，皆因佢具備級數踢大會，而且又勤力又多產，同伊巴謙莫域組「高矮雙煞」啱晒！


不過AC要爭贏「野獸」就要問過同市宿敵國際米蘭，後者有大批阿根廷幫，好可能用友情牌招攬「野獸」，若然收購失敗嘅話，據悉AC就會改簽麥斯盧比斯或者加利亞雷拉。