車仔要入Pit加裝新零件

猪拉多纳

23/11/2011
文： 黃興桂

車路士近期接連受挫，最令人意外係兩場主場面對Big4阿仙奴及利物浦全失三分，領隊保亞斯立即盛傳被炒，「神奇教練」希丁克話唔定會走馬上任。不過Peter就唔建議老細阿布咁做，一個領隊好壞與否，實在好難用三幾場賽事去判定，如果曼聯輸幾場就炒領隊，邊會有剛度過廿五周年嘅費格遜呀！

睇多保亞斯三個月

今季改由保亞斯領軍嘅車路士，個人認為成績唔算太差，至少在歐聯都叫做兩勝兩和排榜首，就算上場對利物浦輸波，其實踢落都唔曳，只係踢波講技術之餘，有時仲要睇吓班波順唔順！車仔只係輸唔夠運，阿布應該畀啲耐性，睇多三個月先考慮換帥啦！


不過，保亞斯都要盡快去改善球隊問題，首先一眾前鋒真係唔掂，費蘭度托利斯踢咁耐都仲未上番最佳狀態，而杜奧巴就雪到冇態，安歷卡又走下坡，一月轉會市場重開一定要考慮入貨。至於中場就最好擺番莫連奴過往愛用嘅雙防中陣式，車仔今季實在太多失球，係因為缺少第一道屏障而輸波。


為成績或者為減壓都好，車路士今場作客利華古遜都要踢番場爭氣波，鬥志毋庸置疑，以「藍戰士」雄厚實力，應可輕鬆取勝。


金句：葡萄牙好教練只有一個「The One」冇「The Two」