朗尼拒踢右閘愛做Keyman

猪拉多纳

22/11/2011


自從喺「曼市打吡」輸鑊勁之後，曼聯領隊費格遜就急謀對策，安排朗尼出任中場中路，估唔到呢一着收到奇效，「魔童」亦都唔介意食胡機會大減，賽前仲話踢咩位都冇所謂，至緊要幫到「紅魔鬼」贏波喎，咁識擦鞋抵爵爺咁錫你！


賽前休息缺席操練


朗尼墮後踢中場踢上癮，當正自己係「紅魔沙維」咁款，預計今晚喺歐聯鬥賓菲加又會繼續客串Keyman一職。呢位曼聯首席射手尋日雖然休息冇操到，但就同英國《太陽報》話：「I love it！只要有得落場我就開心，踢咩位都一樣，況且中場指揮官呢個位比前鋒更有影響力，入少啲波我都完全唔介意。」




話就話踢咩位都冇所謂，但「魔童」就話唔想踢右閘，唔通佢都知自己太火爆，驚踢後防好大機會孭鑊？朗尼出名牙擦，歐聯前夕不忘寸爆同市死敵曼城：「上季呢個時候車路士喺聯賽榜領跑，最後咪又係曼聯攞冠軍，只要我哋一發力，冇人可以阻到曼聯。」