曼聯魚生粥宴請「賓」客

猪拉多纳

22/11/2011
文： KIT

歐聯分組賽嚟到第五輪，C組嘅出線形勢仍然唔算太明朗，排頭位嘅曼聯仲未可以放鬆，所以費Sir賽前已經落定「柯打」，今晚喺奧脫福迎戰同組主要對手賓菲加，一定要攞晒3分，以求首名出線。考慮到紅魔鬼近排鍾意煲魚生粥，大家熱捧主W之餘，想博冷則可以諗諗3.45倍「讓球和」o架！（有線61及201周三凌晨3:45直播）




紅魔今季個頭開得唔錯，之不過近排就好似跌晒Watt，雖然仲識繼續贏波，但火力就明顯不足！翻查紀錄，原來曼聯成立以嚟，只係試過5次連續5場聯賽入波唔多過1粒，呢個咁罕有嘅情況最近竟然再現，佢哋近5場英超都係得1球進帳，有英國傳媒話曼聯之所以搞成咁，係因為中場創造力唔夠，進攻組織比較單調，轉踢中場嘅朗尼於周一更缺席操練，好彩翼鋒艾舒利楊格傷愈復出，側擊力加望增強。


紅魔睇中對手阿根廷新星


況且，小妹根本從來唔擔心，事關成季流流長，點都要回吓氣，唔通場場同你死衝爛衝咩？好似跑馬咁，你係騎師都唔會一出閘就要隻馬狂衝到終點啦！雖然曼聯近仗入波唔多，但勝在防守做得好，防中卡域克表現尤其出色，變相減輕後防壓力，就算中堅尼曼查維迪停賽都唔驚。




作客嘅賓菲加歷來3次作客奧脫福都輸波，但其中兩次都係僅以1球落敗。當然，就算話牌面唔夠砌，小妹都肯定佢哋唔會完全放軟手腳，事關賓菲加個前鋒奧斯卡卡度素不嬲都係費Sir最怕嘅射手，加埋佢拍檔奧斯華度加坦又係紅魔鬼嘅收購目標，費Sir以前就派過做XX嘅細佬馬田費格遜去睇辦，今次呢個阿根廷前鋒難得可以喺奧脫福「騷哥利」，唔通唔搏命咩？


賓菲加會長督師實搏命


仲有，賓菲加個會長路爾斯韋拉今次仲同埋部分高層，提早幾日去到英國莫爾文主持球會喺當地嘅分會開幕儀式，順便隨隊提早去曼市備戰，緊張到出晒面，試問班波仲點會唔落力，唔似會被大炒囉。