西班牙狂牛撞瓜冇牙幼獅

猪拉多纳

12/11/2011
文： 朱楓

今晚溫布萊球場爆發重量級熱身賽，由英格蘭大戰西班牙！本來呢場賽事應該係五五波，不過「三獅兵」領隊卡比路賽前揚言會派大量新人應戰，冇經驗冇實力，呢隻牙都未出齊嘅幼獅仔，又點頂得住來勢洶洶、夫添出擊嘅西班牙「狂牛」？朱楓捧1.9倍客W！（now671台及廣東體育周日凌晨1:15直播）




賽前英國傳媒狂插英格蘭領隊卡比路，皆因呢位意大利籍名帥喺今晚對西班牙嘅熱身賽，竟然表明唔會派強陣檢閱實力，反而想畀新人落場試陣，睇吓佢哋實力去到邊。卡比路仲話到明，受種族歧視風波困擾嘅泰利唔會披甲，會用菲爾鍾斯或菲臘積基爾卡是但一個，拍住尼史葛鎮守中路，但佢哋一個冇經驗，一個唔夠班，點靠得住呀大佬？


英格蘭5前鋒加埋入4球


前線方面，由於朗尼被罰嚟緊歐國盃決賽周停賽3場，加上謝拉特養傷，安祖卡路爾冇態，卡比路今次徵召嘅戴倫賓特、韋碧克、史杜列治等5件前鋒，加埋竟然只得17頂喼帽入得4球，朱楓真係睇唔出佢哋有能力撕破西班牙防線囉！事實上，「三獅兵」一向雷聲大雨點小，自從卡比路上任後，7次面對傳統勁旅（法國、德國各2次，巴西、荷蘭、西班牙各1次）只得1勝1和5負，家陣仲學人玩試陣，同送死有乜分別？


西班牙8將踢過英超


相反，西班牙對今場比賽極度認真，幾乎徵召上年世盃冠軍班底應戰，為咗令巴塞班主力可以抖足精神，西班牙足總賽前仲特登將呢場波由尋晚改為今晚踢，擺明想搏殺搶W。咪忘記一點，就係「鬥牛軍」陣中有8位球員曾經或依家喺英超搵食，熟晒對手路，尤其係車仔嘅桑馬達、曼城嘅大衞施華呢對翼弗到爆，配合韋拿喺前面搵食，呢班惡氣十足嘅「鬥牛軍」，今晚隨時玩轉溫布萊，幫幼獅上寶貴一課！


橫數千軍


 英格蘭近3次對賽輸晒




‧近8場4勝3和1負。

‧近6次交手1勝1和4負，對上3次全敗兼食白果。

 西班牙近10戰入28球

‧近10戰勁入28球，平均每場入2.8球。

‧近8場7勝1負，7次開大。