曼城金童孖寶爆破潛艇

猪拉多纳

02/11/2011
文： 阿占

歐聯「死亡A組」果然名副其實，拜仁、拿玻里、曼城爭出線爭到頭崩額裂，今晚曼城作客維拉利爾一戰關乎生死，刺激好玩嘅死亡A組真正Game Start！「藍月亮」近排6連勝弗爆，加上巴洛迪利復出拍阿古路，呢對「金童孖寶」勁到好似打機咁，入波當食生菜，肯定玩到潛艇條防線陀陀擰，一於穩穩陣陣捧1.45倍客勝！（有線61及201周四凌晨3:45直播）

歐聯「死亡A組」果然名副其實，拜仁、拿玻里、曼城爭出線爭到頭崩額裂，今晚曼城作客維拉利爾一戰關乎生死，刺激好玩嘅死亡A組真正Game Start！「藍月亮」近排6連勝弗爆，加上巴洛迪利復出拍阿古路，呢對「金童孖寶」勁到好似打機咁，入波當食生菜，肯定玩到潛艇條防線陀陀擰，一於穩穩陣陣捧1.45倍客勝！（有線61及201周四凌晨3:45直播）


曼城上仗歐聯憑阿古路補時階段入波，終於攞到球會史上第一場歐聯勝仗，士氣大振，往後幾場波，曼城就愈踢愈順，近3戰仲喪到入咗14粒，代表作當然係喺英超作客奧脫福以6:1蹂躪曼聯啦，阿占覺佢哋喺嗰場波嘅霸氣，只有巴塞同皇馬可以與之相提並論！


兩大神箭加埋勁入16球


領隊文仙尼一早落咗柯打，話要喺歐聯小組賽首名出線，但曼城家陣形勢唔算太好，分別落後拜仁同拿玻里3分及1分，今場對住全組實力最差嘅「黃色潛艇」維拉利爾，再唔搶足3分真係唔掂！正所謂旺開有條路，被文帥譽為「歐戰猛將」嘅「意國金童」巴洛迪利，喺歐戰刑滿復出，佢近排又紅又弗，「Why Always me？」金句街知巷聞，只要佢正正常常唔好搞事，同另一位「金童」阿古路拍住上，以呢兩位前鋒加埋入咗16球嘅威力，要摧毀潛艇防線話都冇咁易啦！

對家維拉利爾本身戰鬥力係唔差，可惜黑仔抽中「死亡A組」，依家3戰全敗，今場若果再輸就提前出局。要出現奇迹惟有焗攻，但咁搞法無論喺戰術上同心理上都有好大限制，喂大佬，強如曼聯都要輸1:6，家陣「潛艇」要同曼城鬥攻，仲唔係「自掘墳墓」咩？


輸波即出局維拉利爾焗攻


仲有，維拉利爾今季喺西甲踢到一塌糊塗，成隊波除咗基奧斯比羅斯，根本冇人識入波，家陣羅斯打柴，叫做有啲質素嘅尼爾馬又係長期傷兵，就連第一後備馬高魯賓都話有排抖，最大劑係連埋之前傷咗嘅馬真拿、沙柏達華倫西亞、啱啱上場波打埋柴嘅辛拿、卡尼同卡梅拿斯，成隊維拉利爾足足有8件傷兵，教練加列度得番13個一隊常規主力可以調動，陣容殘到喊，今鋪對住曼城，睇怕凶多吉少咯