拜仁靠晒列貝利

猪拉多纳

02/11/2011
文： Wendy

仲記得列貝利上季講過，如果拜仁慕尼黑冇歐聯踢，佢就會離隊，當時覺得佢真係好現實。今季換咗教練後，拜仁成績重上軌道，列貝利已經轉晒口風，話希望喺拜仁踢到卅五歲喎！今季拜仁能夠反彈，佢嘅功勞唔小，有入波又有助攻，今晚主場迎戰拿玻里，可能都係靠佢食胡。


歐聯分組賽A組兩個出線席位，應該都係拜仁、拿玻里同曼城三隊爭。拜仁依家以不敗姿態排榜首，今晚贏埋就好穩陣。球隊近八場主場全勝，氣勢強勁，上場德甲主場輕輕鬆鬆就贏紐倫堡四粒，賽後馬里奧高美斯仲風騷咁話呢場佢哋係特登「hea」踢，留力歐聯喎！


拿玻里防線不整


賽後舒韋恩史迪加話有傷，好彩今晚趕得切復出，不過佢今晚若再攞黃牌，下場就要停賽，要小心呀！上次碰頭拜仁其實已佔上風，可惜馬里奧高美斯射失十二碼，先至打成平手。

相比起拜仁，拿玻里板櫈深度就差啲喇，好似上場意甲作客卡坦尼亞，教練馬沙利想話微調個陣容留力今晚歐聯，點知隊波即走樣，最終一比二輸波。後防保羅簡拿華路今晚停賽，加根奴亦繼續養傷，睇番拿玻里頭三輪歐聯分組賽都唔多射門，仲係咁多隊中射門中目標最少嗰隊，就算手上有卡雲尼同拿維斯，但喺歐聯都惡唔出樣，預料呢場佢哋會成場受拜仁壓力，分組賽不敗之身恐今晚被破喇！


球彩全女打


熱愛舞蹈的Wendy，04年歐國盃Euro Babe變身成有線球彩台節目主持，當初對足球猶如混沌初開，依家已滾瓜爛熟，最愛暢談波經