紅軍專心聯賽玩殘曼聯

猪拉多纳

15/10/2011
文： 江忠德

英超係高度商業化嘅聯賽，經營一間球會唔再淨係講熱誠咁簡單，更重要係生意頭腦，點樣謀取最大利益，既可以繼續生存又有好成績，先至係致勝之道。紅軍老細絞盡腦汁，球員梗係要全力配合，曼聯作客晏菲路會陷於苦戰。




利物浦近期向電視轉播權費打主意，其實無論係用乜嘢方法，最緊要先有好成績，先至可以聲大夾惡兼理直氣壯。紅軍冇份踢歐戰，球員多咗時間休養生息，而且近兩季喺主場恰住曼聯，仲有杜格利殊玩低調，減輕球員心理負擔，已經做足工夫畀顏色曼聯睇！


阿仙奴難啃黑貓


至於禮拜日晚兵工廠撼新特蘭，阿仙奴再有差池嘅話隨時護級，而雲格承受壓力亦接近爆煲，不過為咗減壓而喺主場急攻求勝係兵家大忌。事實上，阿仙奴近兩季都咬唔入「黑貓」，要靠現時條甩皮甩骨防線支撐，今仗攞到三分已經收貨，求大勝反而好易得不償失，畢竟新特蘭球員平均質素唔差，只係衰在例牌季初慢熱，呢場有備而戰，兵工廠肯定惡啃！