白俄爭出線焗攻 瑞士U21睇定嚟食

魑魅魍魉

18/06/2011
文： 牛奶仔

U21歐洲國家盃今晚嚟到最後一輪賽事，A組有瑞士U21對白俄羅斯U21，兩支球隊同樣要為出線搏殺，今仗一於捧狀態大勇嘅瑞士，擊倒有兩名主將停賽兼焗攻嘅白俄首名晉級，1.68倍主勝值得捧場。（now632台周日凌晨2:45直播）




瑞士U21雖於分組賽兩戰全勝，但仍未能敲定出線席位，不過今晚只要攞到1分，就足以穩奪首名出線，心理上始終佔優勢。瑞士今屆雖冇選到利華古遜前鋒戴迪約克入伍，但絲毫無損佢哋嘅入球能力，尤其係首場擔任後備嘅史浩克04前鋒加雲奴域，喺上場被委以正選並有好表現，預料今場會繼續擔正攻堅，加上入球點分布平均，相信可對白俄後防構成一定威脅。


8場不敗弗到漏


相比連續8場比賽不敗嘅瑞士，白俄表現就冇咁穩定，分組賽首場擊敗同組弱旅冰島後，上場面對東道主丹麥就喺領先情況下反敗1:2，士氣肯定受到一定打擊。依家佢哋同丹麥同得3分，但因對賽成績較差而暫列第3位，今場一定要贏波先可以出線。




最令白俄閉翳嘅地方係兩名中後場主力布卡堅同波利迪域治同樣累積兩面黃牌，今晚自動停賽，令原先不太穩健嘅防線雪上加霜，遇上睇定嚟食嘅瑞士，白俄焗攻隨時會出現反效果，睇怕呢3分都係凍過水。