河床搏魯命護級

魑魅魍魉

18/06/2011
文： 九叔

今季阿甲秋踢埋呢兩日就煞科嘞，由於沙士菲晨早已經篤定冠軍，剩番落嚟嘅焦點，就得番河床會唔會降班，同埋小保加响巴拉莫掛靴戰會唔會贏波，因為兩隊為生存、為攞彩都要搏，今日不妨睇高半線，尤其主場對拉魯斯嘅河床，個1.77倍主W玩得過。（開賽時間：周日凌晨2:00）




由於阿甲降班係計3季成績嘅，今季排响中游嘅河床，3季平均總得分只得1.248分，排响總分榜尾五，只係比奧林普（1.216分）高些少，假如今晚輸畀拉魯斯，奧林普作客又鋤低篤定降班嘅基爾梅斯嘅話，河床就淪落到要踢護級附加賽，到時死唔死得都好惡講，所以今晚一定要贏至甩難。


拉魯斯打風流波


為咗來季唔想跌落阿乙，河床今晚會轉踢「4-3-1-2」陣式搏殺，老大哥艾美達會繼續擔正，羅拔圖佩雷拉、曉高柏禾尼都會落場，除咗後衞艾蘭奴費南迪斯儲夠5黃要坐波監，河床基本上強陣出擊，對住無欲無求嘅拉魯斯，贏面當然比較大。