丹麥搶W半場破冰

魑魅魍魉

18/06/2011
文： Mic少

U21歐國盃進入最後一輪賽事，A組丹麥U21對冰島U21。主辦國丹麥同第三位白俄羅斯同分，出線位置好唔穩陣，想打入四強最好攞齊三分，慶幸對手係同組最弱嘅冰島，相信丹麥會趁機打落水狗，必想盡快取得領先優勢，Mic少一於博2倍「半場主勝」。




（now 633周日凌晨2時45分直播）




過去兩屆主辦國都可以打入四強，丹麥身為東道主，數據上有支持。事實上，丹麥今季整體演出不俗，雖然首仗不敵瑞士，但射門次數比對手更多；上仗落後情況下反勝白俄羅斯二比一，反映丹麥表現愈來愈好，中場主將基斯甸艾歷臣更取得入球，對球隊有鼓舞作用。包尾嘅冰島兩戰兩敗，共失四球兼冇波入，出線機會名存實亡，戰意成疑下，Mic少睇死佢哋半場都頂唔住。


白俄戰意勝瑞士


同組另一場瑞士U21對白俄羅斯U21，瑞士兩戰兩勝形勢大好，今仗和波就可以首名出線，心態及戰術難免會較保守，反觀白俄羅斯唔贏就好可能出局，爭勝意欲比對手為高，「讓球主客和」白俄受讓，捧2倍「讓球客勝」。




（now 632周日凌晨2時45分直播）




白俄首仗輕取冰島兩球，上仗對主辦國丹麥亦先開紀錄，可惜最終僅輸一比二。佢哋最大優點係擅踢逆境波，喺外圍賽附加賽首回合淨吞意大利兩蛋，但次回合反勝晉級，相信呢次成功經驗有助提升今場信心。

賽制：每組前2名進身4強。分組賽出現同分，將順序以下列方法定排名：1.對賽成績　2.對賽球差　3.對賽得球　4.總球差　5.總得球　6.07-09及09-11歐國盃U21賽事系數　7.外圍賽附加賽球差　8.外圍賽附加賽平均得球　9.公平競技評分（只計決賽周賽事）　10.抽籤