洪都拉斯爭首名大晒冷

猪拉多纳

13/06/2011
文： 朱楓

洪都拉斯日前喺金盃大勝，賽後領隊路爾斯蘇亞雷斯話即時壓力全消，仲話要喺聽朝贏埋牙買加，力爭B組首名出線，但其實牙買加實力唔曳，預計今場防線唔齊整會索性同對手駁火，2倍入球大似乎仲抵博！（開賽時間：周二早上9:00）




講番目前B組出線形勢，牙買加已肯定出線，差在係首名定次名，至於洪都拉斯今場和波亦肯定晉級，但假如想爭首名，今仗就一定要擊敗牙買加。其實洪都拉斯本來被譽為今屆金盃爭標熱門，點知首場被危地馬拉逼和0:0，好彩上場成功反彈，大勝格林納達7:1。


牙買加唔齊腳以攻代守


事實上，洪都拉斯上場喪入7球，創出國家隊喺金盃大勝紀錄，一對前鋒卡路哥斯利同謝利賓特臣更包辦當中5球，賽後謝利賓特臣話同卡路哥斯利愈夾愈有默契，相信入波陸續有嚟！




今場只需和波就肯定首名出線嘅牙買加，雖然上仗以2:0擊敗危地馬拉，左翼迪馬菲臘斯更繼首場對格林納達入波後，個人梅開二度，不過後衞迪蓋威廉斯卻一早傷出，今仗未必趕及復出，面對來勢洶洶嘅洪都拉斯，鬥攻係唯一出路！