中國鬥北韓入波唔慌多

港陌

08/06/2011
文： 朱楓

今晚中國會轉到貴陽同北韓拍跳，雖然國足早兩日擊敗烏茲別克，但其實國足進攻唔掂表現麻麻，對住冇「人民朗尼」鄭大世嘅北韓，睇嚟好大機會係悶戰，熱捧1.55倍入球細冇衰！（中央5台周三晚7:35直播）


國足傷鋒北韓冇鄭大世


憑住郜林入波，中國早兩日喺熱身賽以1:0擊敗烏茲別克，但實情嗰場波國足表現麻麻，特別係進攻方面明顯缺乏默契。因為「傷鋒」嘅關係，鄭智首次喺國足客串單箭頭，但打慣中場嘅佢成日走返後面攞波，結果搞到大塞車，事後主教練高洪波承認國家隊進攻的確有問題，而且唔係踢幾場就醫好，至少要5至6年。雖然貴陽嘅球場今晚會係落成後首次舉行國際賽，預計將有大批球迷入場支持國足，但賽前傳出汪嵩、杜威、于海都唔踢得，想爭入波唔係咁易。




北韓今次嚟到中國繼續刻意保持神秘，唔止唔接受訪問，仲玩全封閉訓練，但可以肯定嘅係，雖然北韓今次大軍大部分都踢過世界盃，不過就冇「人民朗尼」鄭大世同射爆巴西嘅志尹南，點睇都唔似可以同中國做大騷囉！