加國靠美職腳醫「恐美症」

魑魅魍魉

07/06/2011


有幾名加拿大國腳都喺美職搵食，比如紐約紅牛迪羅沙里奧、皇家鹽湖城韋爾莊臣及侯斯頓戴拿模夏恩洛特。而効力FC多倫多嘅迪根斯文以及溫哥華白帽球員鄧菲特，其實都屬於美職球員。正所謂知己知彼，百戰百勝，加拿大眾將賽前會與教練團隊研究比賽策略，誓要打破近年不利對賽往績。




加拿大最近一次成功擊敗美國已經係一九八五年嘅熱身賽，而二○○○年加拿大成功贏得美洲金盃，或多或少與加拿大晉級路途上未有遇到美國。而為要醫治「恐美症」，加拿大球員今場將會全力以赴。尤其幾位喺美職搵食嘅球員，佢哋對美國打法相當熟悉，部分更加係隊友，故加拿大賽前會制訂一套針對性戰術，務求可以喺美國身上取得分數。


當路雲剛復操狀態成疑


至於美國方面，効力洛杉磯銀河嘅球星當路雲因傷關係缺操幾日，之前與西班牙踢熱身賽都未有落場。而去到當地時間星期日早上，佢先至投入正常操練。當路雲表示狀態確實有多少回落，但相信比賽當日可以回復正常。