威爾斯搵北愛祭旗省招牌

魑魅魍魉

27/05/2011
文： 牛奶仔

首年舉辦嘅「國家盃」繼續密鑼緊鼓進行，上場慘被反勝嘅威爾斯，經過一日休息後今晚將大幅變陣出擊，面對明顯唔夠班嘅北愛爾蘭有望「威」番次，一於捧1.88倍客勝。（開賽時間：周六凌晨2:45）




「國家盃」前身為英國本土四角賽，今次事隔27年後「重出江湖」，竟然搞到一鑊泡，啲賽程令人摸不着頭腦，其中威爾斯仲要喺3日內踢兩場賽事，球員體力肯定未及回復，令賽事可觀性大減。


比拿美艾朗藍斯孭飛


上仗威爾斯半場領先1球下，最終畀蘇格蘭反勝，條氣當然就唔多順，今次遇上最弱嘅北愛梗係要贏波一省招牌。威爾斯休息咗一日今晚又要再踢，新帥史必一早話明為咗避免球員過勞受傷，會盡量畀所有球員輪流上陣，因此特意喺昨晨對蘇格蘭時收起部分主力，但相信比拿美同艾朗藍斯兩名孭飛球星仍會繼續上陣，面對實力差一大截嘅北愛仍有力結束連敗走勢。




北愛爾蘭上場畀主辦國愛爾蘭技術性擊倒慘吞5蛋，當中仲有4個失波都係由球員犯下低級錯誤所致，依家只休息咗短短兩日又再踢過，球員體力不足就更易犯錯啦！連同2月首場淨輸0:3畀蘇格蘭，北愛今屆賽事兩場夾埋慘吞8蛋，加上頭號射手大衞希利今次仲冇入選，入波本錢可以話所剩無幾。




國家盃形勢




球隊 賽 積分 勝 和 負 得/失球

愛爾蘭 2 6 2 0 0 8/0

蘇格蘭 2 6 2 0 0 6/1

威爾斯 2 0 0 0 2 1/6

北愛爾蘭 2 0 0 0 2 0/8