贏錢心得：鹿角鬥志高受讓着數

港陌

25/05/2011
文： 走肖

亞冠盃16強爆發頂級大戰，FC首爾今晚喺主場迎戰鹿島鹿角，唔似讓得起。今季鹿角喺聯賽出閘脫腳，教練奧利華拉決定將集中力放喺亞冠盃，聯賽專登收起隊長小笠原滿男唔用，今場安排佢復出，擺明搏殺格，受讓平半撐得過。（now671台周三晚6:30直播）




前季16強碰頭，鹿角主場同首爾踢成2:2，最終互射12碼飲恨出局，今次再遇，教練奧利華拉唔敢再大意，日前佢哋作客對浦和紅鑽，專登收起隊長小笠原滿男畀佢休息，成為自05年8月以來，小笠原滿男首次唔係因為傷病或者停賽而缺席嘅比賽，淨係呢個動作，已經睇得出奧利華拉要打真軍啦！


近仗每場起碼入2粒


作為日職最多錦標球隊，鹿角向來重視聯賽多過亞冠盃，但受到東日本地震影響，今季鹿角喺聯賽開局好差，暫時5戰得1勝2和2負，爭標前途絕對唔樂觀，咁大家明白，點解奧利華拉寧願收起小笠原滿男踢亞冠盃啦？再講，近5場鹿角每場起碼入2球，火力絕對唔曳，射手興梠慎三有機會再發威。




對家方面，首爾安排崔龍洙由助教坐正做教頭後，曾經有段5勝1和走勢，直到日前喺主場以1:2不敵FC大邱至輸波，而且陣中3大外援，包括射手丹恩奴域、前鋒梅里斯奧摩連拿同中場迪積佩洛夫都相當猛料，可惜首爾今屆分組賽對名古屋鯨魚得1和1負，對住日職球隊似乎冇咩辦法贏波，讓平半始終冇着數。