摸熟球隊特性 搵食有保證

港陌

21/05/2011


相比起歐洲聯賽，香港人肯定冇咁熟悉巴甲，有時講啲主力傷咗，大家亦未必知道影響有幾大，反而如果熟悉各支球隊嘅盤路同慣性，可能仲容易搵到食，以下五支巴甲球隊喺上季都各有一個極之突出嘅特性，絕對值得大家參考！


盤王甘美奧 +1贏開巷


雖然富明尼斯係上季巴甲冠軍，但係原來最幫大家贏錢嘅反而係第四位嘅甘美奧。佢哋喺三十八次開出「讓球主客和下，錄得二十二次贏盤、四次開讓球和，當中十七次喺「+1」下，更十二次贏盤，贏盤率超過百分之七十。


慢熱山度士 旺半場和


雖然擁有尼馬同甘素等出色進攻球員，但山度士踢法極之慢熱，上季三十八場聯賽嘅上半場竟然二十四次同對手打和，同已降班嘅古蘭尼一樣咁多，相反下半場除頭五分鐘外，其餘時間都入過波，新季可絕對要吼實佢哋嘅「和客」同「和主」。


哥連泰斯 主場惡霸


巴甲大部分球隊都靠主場搵食，當中哥連泰斯可謂表表者，上季主場獲15勝2和2負，勝率高達79%，數據係全巴甲至勁。至於「作客王」就係高士路，獲9勝4和6負，不敗率達68%。


明尼路 大騷常客


雖然明尼路上季只排13，但球隊入波同失波都極多，分別有52球同64球，難怪全季有63%賽事開入球大，同甘美奧冠絕巴甲。兩隊主場開大比率更高達74%，比率同樣係巴甲最高。


高士路領先 對手難追


如果畀高士路入到波先，對手就好難翻身，事關高士路上季十五次喺上半場領先，下半場竟未試過被追平或倒輸，玩佢哋「主主」同「客客」真係好好路；相反艾華爾上季十六次喺半場落後下就未試過反勝，只得四次追和，其餘都係一輸到尾。