撐奧沙炸沉潛艇護到級

港陌

21/05/2011
文： 車車

英超榜尾爭崩頭，西甲呢邊都係喎！「地上最強」巴塞隆拿已提早奪冠，而第二至第七名嘅形勢又相當鮮明，基本上周日凌晨嘅煞科戰係為榜尾而設。




靴高斯同艾美利亞已篤定降班，咁第三支降班球隊又會係邊隊呢？假如薩拉戈薩、拉科魯尼亞同基達菲今晚都齊齊贏波，而奧沙辛拿不幸輸波咁就會降班。不過，我就會撐奧沙辛拿會贏波保住西甲席位喇！（周日凌晨4時開賽）




事關奧沙辛拿好彩只係對維拉利爾，「黃色潛艇」依家冇嘢要爭，會鬆章畀奧沙一啲都唔奇。其實主隊都曾經陷入低潮，當時連續八場聯賽不勝後，但又出奇地主場贏皇家馬德里一比○，即係主場會踢高一皮波啦。


維拉利爾放軟手腳


再講，維拉利爾去到四月頭開始都放軟手腳，或者要分心歐霸盃啦，所以聯賽演出無之前咁搏命，近兩場作客都係和波收場。睇埋往績，奧沙辛拿近六次主場出擊曾經贏過三次，和過二次，維拉利爾贏一次，希望奧沙辛拿今晚醒定啲，今季唔使降班啦！