里爾煲索察魚生粥

魑魅魍魉

18/05/2011
文： 笛子波童

隨着馬賽上場失分，剛奪法足盃冠軍嘅里爾今晚主場如能擊敗索察，法甲奪標機會可謂高唱入雲，不過佢哋剛剛踢完決賽體力消耗大，面對大勇嘅索察或遇一定阻力，大勝機會不高，如嫌1.32倍主Ｗ太熱冇肉食，可敲3.55倍「讓球和」。（now 634周四凌晨１時直播）




經過上周末比賽，里爾距離雙料冠軍目標邁進一大步，佢哋先喺法足盃決賽擊敗聖日耳門捧盃，同時聯賽爭標對手馬賽作客羅連安特又失分，依家里爾領先馬賽三分兼少踢一場，只要餘下三輪多取四分便可肯定封王。睇番賽程，里爾未來兩仗將要作客聖日耳門及主場鬥雷恩，以實力計以今場對手最易應付，相信球隊唔會輕易讓優勢流失。




唯一隱憂係里爾經過上場惡鬥聖日耳門，身心虛耗大，而且休息時間又比索察少，未必可以贏得好輕鬆。索察狀態不俗，近七場聯賽五勝兩和未輸過，而且佢哋今季作客馬賽、里昂、聖日耳門、雷恩等前列球隊都係輸一粒，如果想求好分頭，可小敲「讓球和」。


波爾多聖日耳門吼細


另一場波爾多主場鬥巴黎聖日耳門，波爾多教練泰簡拿早前不敵索察後辭職，由暫代教練比杜特領軍依然冇起色，擺明等收咧。聖日耳門仍有機會爭入前三踢歐聯，戰意較可取，不過球隊剛剛失落法足盃，門將哥柏末段犯錯影響軍心，而且佢哋最近四次作客波爾多未贏過，今場捧細盤穩陣。