同國內訌優勝劣敗

魑魅魍魉

18/05/2011


歐洲足協於09/10球季開始，將歷史悠久嘅歐洲足協重新包裝為歐霸盃，希望可以提升賽事競爭性及吸引力，上季馬德里體育會成為賽事變身後首支冠軍。包括足協盃在內，過去十屆比賽，西班牙球隊非常威水，奪得其中四屆冠軍，包括○七年囊括決賽兩個席位，結果西維爾憑互射十二碼擊敗愛斯賓奴成為盟主。


國米西維爾有辦睇


自從97/98年度開始，決賽改由一場定勝負，此前曾出現兩屆決賽由同國球隊對壘，除上述西維爾對愛斯賓奴外，仲有九八年意甲內戰，國際米蘭大勝拉素三比○。呢兩次同國決鬥都係由聯賽排名較高一隊勝出，今屆兩支葡萄牙球隊交手，葡超冠軍波圖有望延續呢個宿命。