YIN''S TALK 洪禮賢講馬：行家Ｎ的馬場經歷

港陌

　　前文說到有位行家耐力驚人，嗰期佢嘅「飛佛」一唔脗合自定嘅元素，寧願全日唔拔鎗，真係值得借鏡。而講開忍功呢方面話題，記得年前有另一位行家Ｎ的一次經歷，亦可以攞出嚟講吓。

　　發生地點喺馬場之內，話說佢行行吓，有位馬迷走埋去問佢：「喂，Ｎ仔，今日有咩心水？」Ｎ答：「尾場３號啦，幾有信心㗎！（最終嗰匹馬廿幾蚊贏咗）」搭訕過後，該馬迷拋下幾句，令佢好冇癮嘅說話，跟住佢就無言以對，黯然彈開。

　　該馬迷那幾番話係：「喺之前幾場咩都輸乾輸淨啦，唉，去到尾場仲邊有錢買呀？」「隻馬咁熱，冇肉食，買幾多都冇用啦！」「有冇咩冷門好啲呀？可以翻身啦！」

投注要忍忌忟

　　坦白說，該馬迷出發點冇錯，亦心水好清，或許自知博彩心態及在場內宿命係點，次次自己擔綱演出，點會唔知未到最後一場已彈盡糧絕。同埋，與其最終一樣係撇帳，點解唔搵隻冷門博吓，起碼賽前有個一場翻身的假象，或有可觀回報嘛。喺馬場之內，未必有give and take 及no pain no gain的主義，投注幾多，唔代表有幾多回報。而輸過痛過之後，可能只會更痛，得着談不上（領悟與否係另一問題）。所以，「忍」和「忟」兩字，發音所差無幾，但卻左右了投注的結果，事後孔明吧，如果那位馬迷肯忍，叠埋心水買Ｎ尾場提供，搵唔到餐晏， 都贏到杯茶啊。