洪禮賢講馬YIN''S TALK：不怕錯就怕拖

魑魅魍魉

　　生活習慣唔容易改變，就以自己為例，久不久會逛逛book　shop，因為鍾意reading books（費事寫中文，唔利是嘛），不同種類的也會購置，但通常喜歡具推動力的，但看多了，其實好些題材，不論作者是何許人，甚麼國籍，由咩人去翻繹，好多出發點也雷同；像近日與我為伍的一本，叫做甚麼推動力，當中有幾句都啱用，放諸賽馬活動之上，亦得噃。

　　此中提到「不怕錯，就怕拖」。行動未必會帶來成功，但不行動注定無法成功。另外，尚有推動自身精神，最要不得的說話，如：「明天、後天、下周、將來」。因這般的說法，與永遠不能做到的意義相同。

　　事實上，生活與玩馬就算唔同，某些習慣可能不易改。譬如生活上鍾意杯中物，戒不掉；玩馬就鍾意場場買，又係搣唔甩。說到後遺症，前者會傷身，後者會傷金。推動自己去改掉某些習性真係唔易，多口嘅人，就係多口。喜歡無事生非嘅，可以無風起浪，話之佢喺沙漠。若然，習性不好，嘗試改變係好事，當然，唔好勸說自己聽日先改啦！

　　假如場場玩馬真係傷金，咪試吓買少啲，或集中火力瞄準三兩場。唔係講笑，筆者有位行家定力驚人，多年前都係以佢為學習榜樣，佢次次入場唔係冇錢喺身，動輒萬萬聲喺袋，但如果某場馬佢睇唔通，又或者覺得唔對路，如賠率唔啱嘅話，攞支士巴拿都撬唔到佢一分一毫出嚟，全日齋睇同埋做筆記。定力如此驚人真係抵佢成功。

■ 洪禮賢　馬會賽馬節目主持