洪禮賢講馬：賽期拉長係好事

魑魅魍魉

　　今個馬季好似過得比較漫長， 賽期拉長了1個月，姑勿論係因為加了賽期， 或是避撼世界盃都好，但長還長，作為從業員的我，覺得安排Ｏ喎。唔理係跑78期， 定係83期，阿賢放大假總會在8月，冇咩影響到。至於賺取的金錢亦冇話特別多咗（或者我嘅人工係偏離正常線之下吧），反而汗就流多咗，話晒行多5期，在馬場出出入入嘛。

　　雖然呢季賽期加了，如果細心睇番，其實有兩點值得讚，第一，83期之中，再冇出現打叠跑的賽期，呢方面對各界都係好事。或許某些賽馬地區一周跑 8期好頻密冇所謂，但香港就係香港，文化完全唔同，馬迷們顧得今期（譬如跑星期五），唔會刨定星期日嗰啲馬，但馬會排位又一早出埋，如果係做「馬紙」那類業界，肯定大受影響，未出今期賠率版， 下期排位版又要出街，但又會有幾多馬迷咁上進，買定兩期一次過刨晒故此，冇打叠賽期，對「馬紙」從業員係德政，唔會影響到生計。而馬迷又唔使咁辛苦連環刨馬，可以較輕鬆去享受賽馬。

　　另外， 由於賽期拉長，久不久就會在周中停戰，大家都有歇息機會。當然，你可以話，唓！打工就係打工，休咩息呀？要知道，賽馬整個行業唔係一般寫字樓工種，跑到人疲馬乏， 根本對業界冇幫助，仲可能出現「膩」的感覺。反之，在既定的頻密賽期之中， 偶爾停一停，對各方來說，活像一道清泉。

洪禮賢　馬會賽馬節目主持