|
|
來到今季最後一期賽事，謹祝讀者們攞到最後勝利，搵番一大筆唞吓暑，下季5/9再嚟過。在此亦要感謝讀者們一季的支持。至於形勢方面，唔多覺韋達與柏寶的坐騎特別標青，而馬房方面，亦以中下游嗰批邊線馬值得博。
重心場次
第7場 第三班（85-60分）1650米
納帕二號近仗成日跑二至四名，分數摸頂，抑或冇運﹖好難一概而論，不過，上賽初跑同程入Ｐ真係犀利，都唔好計拉士跑線畀對手影響到，剩係睇佢入直路仲喺包尾，而最終入到三甲（當日10場賽事僅得3駒在相若走位下入Ｐ），兼且只係輸條頸，難度分爆燈﹔轉用韋達如在跑法上唔好咁被動，可能更有競爭力。
「智友」被迫放頭仍可上名，證明近期喺「方」，回到此程，性能完全OK。「國寶」太準，一日未甩三甲，依然要重視。「歡歡樂樂」唔係完全確定到上場係場地，定係眼罩幫到手，如果係後者的話，轉場仲啱。
「卡加大師」唔好介意剛仗跟好位返嚟唔多，因今場負磅更輕，同埋，前段或會慢，有權食正形勢。「帝豪名駒」之前入Q可能係慢地所致，就算有轉馬房概念，但工序一再阻塞也有憂慮。「普梳王」如忽然跑得番，根本唔怕任何對手。
第1場 第五班（40-0分）1200米
卓暉一心落班，之前跑成點﹖輸得幾遠﹖大可置之不理。呢次降班跑即在配件上有變動（重戴開縫眼罩曾有Ｐ），仲遇到有利的Ｂ欄，排到內檔仲筍，有理由相信會跑番好。「金大人」五班往績各走極端，兩場泥地輸晒，但3場谷草則獲冠亞季，今次來到主場，有望現形。
「勁駿」贏開，但此程不及1000米。「心路」有班，惜季內屢次令人失望。「好小子」剛仗臨場換人，跑法錯晒，賽績唔使理，計佢1400米上名的級數，縮程或撈到油水。「智勝寶」要形勢夾啱，才會有表現。「算得妙」馬重加番係好事，如5檔唔係被頂在外叠，以佢嘅速度唔排除會接近。
「真係駋」之前唞過體力有着數，早前試谷草亦唔錯，有權接近。
第2場 第四班（60-40分）1650米
創新高按四仗前贏馬水準，之後唔應該冇得再Ｗ，慶幸近幾場敗多少有借口原諒，呢次操住嚟等今場，也加添配備，應該有決心。「高歡」上賽前準備有瑕疵，陣中一樣似模似樣，如承接番進度，轉程都未必唔得。
「及時雨」一再因排檔關係，令陣上要走蝕位，今場終排好位，仲忽然用好手，前仗輸近係咪純粹地淋，應有答案。「超力好」前置跑法在今場可能發揮作用。「奔騰飛駒」突然轉好的賽績唔知能否延續。「友情友義」無端端幾多飛﹖﹗
第3場 第四班（60-40分）1200米
亞洲橙王季內四班未贏過，但有本事頻頻上名，而無視賽道和排檔偏差，點都有卡士﹔碰上今場早段唔會慢的形勢，後上跑法着數。
「皆大歡喜」如之前冇胃口並無後遺症，計馬屬必然之選。
「贏啲啲」演出太穩定，正路配腳。「長勝福將」6檔可能有點尷尬。「家橋」2檔則會賺，只要唔好又放頭便成。「開心好多」如日後收斂到，唔係單靠速度打拼，四班唔會冇馬贏。「聚豪精英」40分但唔跑頭場五班1200米，純粹貪輕磅，唔多信囉。
第4場 第四班（60-40分）1800米
好運得福唔漏閘，上場係咪會贏到，其實係兩睇，不過拉士的確幾爆炸性，咁啱今場或繼續出現有利環境，再揀。「好旺財」見晒底，唔叻但近況企穩。
「八飛」上場一步冇蝕，攞晒內欄着數，所以輸近的水準不宜過分放大，加上轉程唔係冇變數。「高明威威」及「天鷹」級數略秤先。「再度豪情」準字當頭。「神箭金剛」四班充其量係P望。
第5場 第三班（80-60分）1800米
喜寶寶五月復出後才是第三回合，體力應該贏晒，至於上賽名次落後，或許直路早段被Cut影響。既然是次賽前有大閘，路程又啱，畀多次機會。「歐洲駿馬」根本長途方是射程，加程有好冇壞。
「神風先驅」1600米轉此程點都好啲，只係要博谷草性能。「財駿福星」唔係太鍾意上賽的處理手法，希望換人肯主動多少，會更具威力。
「星際雄師」曾腳傷，唔知影響成點﹖「本地實力」三班同程屬前列常客。
第6場 第三班（80-60分）1200米
大進排1檔及新勝，而加磅唔算多，面對壓力唔係大，唔難再有好成績交出。「心中有勁」早段應有機會泊到好位或自領，形勢比上場為佳。
「駿蹄飛」唔係贏完要「消化」，按上賽追勢，仍有爭勝條件。「浚鋒天河」冇配件未好過，突然除罩非好兆頭﹖﹗「嘉飛」啱啱在同程有晒內欄慳位優勢，返嚟都冇P，略失望，但今場可揀之馬不多，勉強可做腳。「祥勝愛駒」9檔唔係好，兼且分數累積一定升幅了﹗
第8場 第一班（105-80分）1200米
美猴王輸畀「盈彩繽紛」亦冇得好講，而嚟返主項，又冇咗勁敵，可補中。「開心風采」向來要靠賽事跑起狀態，休出有點戒心。「威利多多」3檔令競爭力有番晒。
「威騰」揀開又跑得唔錯，加上，此程比泥地更合適，再追。「特好」準備上唔完整。「鼓浪天風」只要前中段夠快，隨時又有驚喜。「紅衣司令」上賽演出太差，有級數也唔敢揀。 |
|
金睛卡
发表于 2010-7-14 13:08
变色卡
显身卡