馬主論戰

魑魅魍魉

任達華：金紫荊夠主動

　　跑埋今晚賽事馬季就煞科，最希望梗係贏錢標尾會喇﹗先推介第六場「金紫荊」，今季唔經唔覺已經贏咗三場，近兩仗雖然三甲不入，但其實都唔輸得遠，今次用梁家偉減磅上陣，隨時又可以用主動跑法偷雞，冷冷哋諗得過。

　　另外鍾意第七場「國寶」，季內跑七場獲三冠一亞三季，上名率高達百分百，真係準到冇人有。今次轉嚟谷草一哩上陣，以往一早已經試過響跑馬地上名，場地性能唔使擔心，排埋一檔更加如虎添翼，坐位望贏。

張敬山：創新高見真章

　　馬季今晚煞科，不過我就唔會入場，因為我位好朋友朱醫生（Gary）亦響今晚幫BB擺百日宴，我當然要出席喇﹗響度要再一次恭喜佢。至於今期心水，係第二場「創新高」，贏得「蓋世子牙」嘅馬，照計四班唔會留得住，今次加個鼻箍上陣，係時候見真章。

　　另外，我亦睇好尾場韋達坐騎「美猴王」，上場跑沙田唔多啱發揮，今次返番主場上陣，威力隨時倍增。改由韋達操刀，若然畀佢贏埋呢場之後攞冠軍，簡直係劃下完美句號。

梁廷鏘：龍武軍咪睇小　　

　　剛啱葉楚航憑「人人興旺」贏馬，今晚佢馬房手馬都有一定實力，話唔定又有頭馬見面。最啱心水係尾場「龍武軍」（圖），以往響谷草1200米贏過五場頭馬，絕對係路程專家，上場爆大冷同「活力飛駒」串Q，證明仲有分響手，今次再跑強項唔可以睇小。

　　另一匹要留意嘅葉廐馬係「友情友義」，薛順強跑埋今戰就掛靴，葉楚航將呢匹馬交畀佢跑，若然贏咗就真係有情有義，增程跑一哩或者更啱呢匹「幸運馬主」子嗣發揮，一於捧場。

龍武軍