馬主論戰

魑魅魍魉

任達華：奪寶有權放到

　　季尾階段，集中揀有分頭嘅馬嚟捧場，隨時會有驚喜。先推介第七場「奪寶」，前仗響田草1400米一放到底贏馬，四歲自購馬已完全適應水土，上場輸咗可以當係回氣，今次轉嚟泥地一哩上陣，同場唔多放頭馬，若然畀佢操控到步速，有權放到。

　　另外鍾意第八場「馬主精英」，季內曾經贏過田草1600米，當時並冇戴眼罩，今次除眼罩再跑番贏馬路程，計條件已經有力一爭，繼續用勞愛德操刀，排二檔早段易搵遮擋，隨時贏得。

張敬山：高駿縮程起筷

　　我細佬Sunny個BB，已出世三個月有多，今日我哋將會響屋企同佢擺百日宴，希望BB身體健康、快高長大﹗講番賽事，我有份嘅團體馬「高駿」又上陣，呢隻馬對上幾場表現其實唔係太差，今次縮嚟跑直路賽，抽到個外檔起步幾好跑，話唔定會有驚喜。

　　另外，我睇好頭場「陽明飛飛」可以贏番場，如果上場唔係跑黏地，應該唔會輸畀「軒轅勇將」，今日場地正常番可以反先。至於第四場「齊勝」無端端走去跑泥地，有分頭可以諗吓。

梁廷鏘：聖迪達演出準

　　馬偉昌今日手馬實力唔錯，我睇好佢有馬贏，先推介第九場「聖迪達」（圖），以往跑過四次泥地1200米，獲得一冠兩亞一季，演出夠晒準，上次對住大超班嘅「天久」，能夠保住一席Q腳已經夠交代有餘，今次再跑強項而對手大幅減弱，可以贏馬補中。

　　另外鍾意第三場「浪漫添馬」，近三場跑谷草一哩非冠即亞，三歲馬的確係愈跑愈進步，今次轉嚟跑田草1600米，照計一定啱腳法，用番贏馬拍檔馬偉昌操刀，更加令人有信心，值得捧場。