借題發揮：馬偉昌勝利回歸

魑魅魍魉

　　馬偉昌自從23/5 因傷唔騎得，都唞咗一大輪至騎番馬，頭尾有成個月咁滯，雖然佢歇過，又曾經有傷，但睇復出之後嘅表現，唔覺有咩唔同，在對上兩期賽事唔少坐騎可以走入前列，就知佢冇受傷患影響。而呢期係回歸賽日，怕且以佢手馬，都唔難回歸勝利嘞啩！大大話話一個月有多冇W落袋，點會唔心急？

　　如果睇佢騎師王隔夜賠率，開出60 倍，就知佢啲馬唔慌係上風，事實上，佢上半場幾駒又真係削，「皇仁俊駒」排12 檔，未跑已瓜咗一半，因通常跑得好都要靠內檔幫手；「電訊超星」及「迅雷烈風」，兩駒上場各輸十個身位左右，邊有期望可言。

　　睇嚟有揸拿都係下半場嘅馬居多，譬如「睡得好」，轉苗廐跑兩場，由短跑起重新嚟過，首回合已追得唔錯，但上場仲係唔加程，寧願加眼罩，結果又係出現追唔切鏡頭，但點都好，該場係公認極強組賽事，跑到第五名算佢本事。連續兩場只係追得接近，阿苗冇得唔在路程上配合，呢次肯加程而除番眼罩，處理上既肯修正，唔會冇企圖。

　　至於「危險英駿」和「金獅威將」，十幾倍嘅冷W，博P分頭都OK；前駒上賽可在唔啱發揮嘅變化地狂追，演出意想不到，跑番好快地或可坐正。後駒上場輸逾十身位，完全脫離現實，話晒前仗仲喺一班此程入Q，唔知係當時場地問題定咩事，總之輸一場有番咁好分頭，博得過嘅！　

亨利