馮諾嘉手記：歡樂寶寶有冠軍相

魑魅魍魉

　　踏入七月馬季倒數階段，馬迷可以估到某啲獎項花落誰家，成績標青嘅候選人馬，當然亦心裏有數，如蔡約翰現時頭馬拋離方嘉柏九場咁多，後者要喺短短五個賽日超越佢實在困難。至於冠軍騎師之爭，現時柏寶同韋達彼此相差四場，近日佢哋輪流大搏殺，相信今日亦唔會手軟。

皇帝旨令輕磅有利

　　精選場次第四場四班1400米，用「皇帝旨令」做膽，季內已經跑過多仗，慢慢跑起狀態，馬身已冇咁肥，上場跑田草1400米，只係以個幾馬位之差跑第三，擺前跑表現好過後上，今場領放馬唔多，相信「皇帝旨令」會照舊搶放控制步速，用何澤堯負磅輕，係時候贏馬開齋。配腳先揀「聚豪精英」，田草 1400係贏馬路程，回師呢程機會重臨。「大喜日子」初出熱身一場後，上場再戰谷草已跑近，今次初跑田草1400米，已經試準唔可以睇小。「吉利多」前仗 1600米快放走勢不俗，上場黏地唔啱腳法，落敗非戰之罪，亦要兼顧。

　　第五場四班1600米，本來韋達坐騎「九龍寶」喺選擇之列，但因左前腳不良於行而退出，由「喜綵」後備補上，後駒前仗喺同程贏馬開齋，今次補出隨時又有收穫，配腳要預佢一席。論到最有冠軍相則係「歡樂寶寶」，出道至今五戰，上場跑1600米強配柏寶，賠率上已有支持，結果後上只輸頭馬個幾馬位跑第三，今次試準再戰，力求開齋可做膽。配腳除咗「喜綵」之外，「盈嘉飛駒」上場喺同程爆出20倍冷W，今場升班減磅，形勢依然有利，要拖。「幸運相架」上場輸在外檔起步兼走三叠，其實之前兩場都跑近，要兼顧。

　　第八場三班1800米，「太平星」前仗流鼻血後足足唞咗五個月，上場久休復出即贏，狀態已經回勇，當弗連捷唔奇，做膽。配腳方面，上場跑梗頸四嘅「赤膽雄威」後上追勢好勁，柏寶騎番，拖腳首選。「危險英駿」上場雖敗但只距頭馬個半馬位，狀態唔差，可以爭位。「曬冷王」前仗田草1400後上跑第三試準，今次跑1800米應啱腳法，拖埋。