馮諾嘉手記：韋達手風順 安御食尾胡

魑魅魍魉

　　柏寶同韋達嘅冠軍騎師之爭，真係充滿戲劇性。對上一次谷草日賽，柏寶一日六捷創紀錄，賽後拋離韋達足足有九場頭馬之多。當大家替韋達打定輸數時，後者剛戰卻一日贏五W，仲替「盈彩繽紛」成功贏得季內第七場頭馬﹔反而柏寶就好似食滯咗咁，全日冇一匹坐騎入三甲，劇情夠晒峰迴路轉。

　　嚟緊踏入七月賽程，韋達、柏寶兩大高手鬥法，將進入直路階段，依家柏寶仲領先韋達四W，話就話有一定優勢，但睇番佢哋近期一係唔贏，一贏就可以一日掃走四、五W，反映今屆冠軍騎師之爭仍然充滿變數。

　　事實上，韋達係多屆冠軍，在港不嬲有好多練馬師力撐，唔計主要坐騎來源蔡廐，剛啱連前波士告東尼都幫佢一把，提供隻「同歡笑」畀佢贏番場，另外大摩亦醒咗匹「飛闖」畀佢騎，有咁強大支持點會冇成績﹖當然，柏寶亦有賀賢、方嘉柏等撐腰，提供多匹實力坐騎，今屆冠軍騎師之爭只會愈嚟愈精采。

　　剛戰韋達憑「安鞍」食尾胡，呢隻馬初出即以三個半馬位彈甩「歡歡樂樂」贏馬，質素肯定高，而同主馬「安御」將會響周四尾場一班1400米上陣，小妹認為後駒有機會幫馬主再食尾胡。「安御」季內先後取得三冠一亞，成績唔錯，上場響田草1400米大敗，但賽後經獸醫檢驗後並無發現異常之處，今次唞近三個月再上陣，體力應該恢復番晒，係時候重開勝門。

　　另一匹要留意嘅韋達坐騎係第九場「有莊有閑」，一月中響田草1400米贏馬後，足足唞咗超過五個幾月先再被安排上陣，聽講係腳部有啲問題。不過，近期呢隻馬操練已正常番，健康應該冇問題，雖然早前試閘冇乜睇頭，但係蔡廐馬一向係咁，今次繼續跑番贏馬路程，可以再贏。