馮諾嘉手記：火龍駒長力十足

魑魅魍魉

　　明日十一場草泥賽，除兩場盃賽外，場場報名馬都相當踴躍，全部十四駒滿額。頭場新馬短途錦標只有四駒角逐，但可觀性卻極高，因為「盈彩繽紛」季內已經六捷，只要佢今場力保不敗之身，就能創出一季內七捷嘅紀錄，值得密切留意。

　　第八場一班2000米馬少場合，形勢明朗，「火龍駒」只跑過三場，首戰熱身後，翌仗跑1800米一放到尾，彈甩「利好」三個幾馬位勝出，上仗縮程跑1600米，最終只以頭位輸畀「悅璐孖寶」。今場初次增程跑2000米，既然贏過1800米，在海外又贏過此程，相信絕對合發揮，有權再添進帳。

　　配腳揀「家家興旺」，前仗跑皇太后盃2400米大長途，後上以頭位壓倒「至勇威龍」勝出，證明水準不弱，上仗跑遮打盃，不單對手強，最不幸是當日落大雨跑黏軟地，對後上馬甚為不利，今戰只要場地正常，力足闖入三甲。「駿綵」上仗皇太后盃跑入季軍，今場對手弱得多，當然要拖。「怡勝」強配韋達，但負重磅只宜作配。四連環揀多匹「零距離」，轉到告廐仍未交代，實好鬥志。

　　第十一場三班1400米，用「騰雲駕霧」做膽，匹馬當打之外，騎師柏寶亦正勇銳，上仗同程以短頭負於「蓬萊仙子」，但今場強配柏寶，加上抽得二檔貼欄好跑，有權反勝。配腳先取「安鞍」，蔡神仙新馬初出已要留意，加上試閘走勢對辦。多拖兩匹新勝猶勇嘅「蓬萊仙子」及「奪寶」，四連環揀多匹「戶外名駒」，今場負輕磅有利，初戴眼罩應有計。