洪禮賢講馬：火龍駒條件勝上場

魑魅魍魉

　　天文台話未來幾日間中有大雨及幾陣狂風雷暴，去到周日情況就好少少，多雲同埋驟雨啫，到時場地會受到幾大影響好難講，點知驟雨會落喺邊，以及幾點鐘先會落雨，不過，總希望唔好落到滂沱嗰隻，始終季尾時分場地已經存在幾大偏差，冇雨落亦唔多利追，落埋雨就更加冇得追，加上會影響晒一場賽事的可觀性，希望到時唔好落喺沙田。

　　周日沙田馬場11場賽事，有兩場出馬少，咁啱都係盃賽，頭場新馬短途錦標4隻，第八場香港賽馬會社群盃8駒，兩場加埋亦唔滿額，真係幾少見。

　　頭場都仲可以話因為「盈彩繽紛」和「美猴王」嚇走晒其他馬，第八場又唔算強弱懸殊，點解湊唔數，唔通高班長途賽唔受歡迎﹖﹗姑勿論如何，同場「火龍駒」應該係爭盃機會幾高嘅馬之一。

加程啱腳法

　　前一場開始貼「火龍駒」，但該役贏得太誇張，亦唔係太過反映到實力指數（罕見三班1800米頭三段超過1分鐘﹗）。但到了上賽則顯示到佢有幾多斤兩，做啱留放，返嚟輸少少，伸算在一班唔會冇得跑，因為該役由1800米縮至1600米、初升二班而磅位冇大減，同埋，直路一開鞭即閃（如果唔係內閃，「悅璐孖寶」未必咁易搵到位），上述全為負面因素，而最尾佢只係輸頭位，百餘分唔難hit到。呢次加程啱得多，磅位輕番，檔位又好，條件其實比上場更正。