洪禮賢講馬：開心動力靠得住

魑魅魍魉

　　毫無疑問，今期的練馬師焦點必然落在方嘉柏身上，忽然出成十駒，又忽然將一大批兵力畀晒柏寶，意味着今次唔係講玩，變相可能幫了阿寶，或會在今期拋甩韋達，鞏固領先優勢。

重心場次：
第9場　第三班（80-60分）1650米

　　旺家多寶戰鬥力演進到唔使靠形勢，目前在班內值中上級，希望今場早段多馬走，借助3檔會慳埋腳程，如非直路又唔規矩，應屆出頭之時。

　　「納帕二號」往後至少有3場田草1600米等緊佢，偏偏係要轉谷草，或有「旺舖福星」新近成功例子在前吧，本身又準得好緊要，正路配腳。「發達心聲」評分差唔多，好在唞過有足夠體力，在尾聲點都吃香啲。「海力童」分數漸摸頂，尚幸路程性能好，同埋，賽事形勢唔會曳。
　
    　「寶利多」跑咩路程都追番段，呢類往往引人跟進之馬，賠率又唔冷，最唔值博（除非落班）。「銀太陽」只怕小梁在步速方面拿捏不及阿滇，加上同場多馬放，或會相沖。

第1場　第五班（40-10分）1200米

　　齊鼓掌礙於性情，目前唔聽話，陣上如騎師於早段留後，隻馬一遇壓力便會亂籠，此乃連續兩場名次落後主因。但兩仗前1400米擺前走的效果幾好，放至最後200米才力弱（頭兩段快過當日三班），反映此際若以速度打拼，唔係冇轉機﹔初跑谷草，性能唔知，但有2檔，如把心一橫，早段肯搶，或可變身。

    　「當旺」有分揸手﹔「秒秒領先」夠準，正路之選。「辣得喜」走規未熟，排靚位會幫好多。「齊齊掂」此程性能不及1000米，且看1檔可賺幾多。

第2場　第四班（60-40分）1000米

　　清新空氣剛周三負頂磅兼二叠望空，可以頂到拉士幾十米才冇Ｐ，賽績好犀利，如非匆出唔夠體力，對住次一皮對手，唔難坐正。「高飛飛」留得到，出閘又冇問題，便於上賽見識到轉型後追的能力，可再追。

   　「帶利財子」及「千兩寶寶」一對馬速度可靠，惜1隻重磅，另1隻大外檔，各有風險。「家橋」面對的難處與後駒相同。「領航動力」易位難贏。

第3場　第三班（80-60分）1200米

　　開心動力唯一此程唔上名在上場，直路打晒困籠冇得好講。敗後順勢唞唞，之後試大閘追勢好，看來小休對之管用。呢次用番阿寶，騎者更熟馬性，點都騎高啲。「祥勝愛駒」近仗之中，只得軟顎有事嗰場冇影，可見此際當銳。

    　「威海歡騰」如果之前腳痛的陰影消退，整體條件唔差。「勁有盈」剛仗唔係塞到最後百幾米，或會更有追勢，呢次換上阿滇，變動好正面。

第4場　第四班（60-40分）1200米

　　再來風排３檔，預計段段有的跑法會賺晒，就算重磅依然有贏面。「亞洲橙王」季內在四班同程的演出算穩定，或許一落班又見影，始終剛賽在盲門的田草仍有兩腳，證明近況唔係差。

    　「開心好多」跑速度，在今場唔到佢話事。「神勇將軍」轉馬房有充足新鮮感，縮程唔怕。「成功年代」場地唔慢，對發揮好有幫助。

第5場　第四班（60-40分）1650米

　　清風駒比較近兩仗末段的走勢，明顯在上場的衝刺力升級了﹔跑夠後嘗試加程係好事，若非唔夠氣量，能力應更勁。「再來旺財」置身一場冇明顯步速場合，或驅使在跑法上進取，有權以慢放愚敵。

   　 「奄尖大少」、「雪山神駒」和「七星仔」剛仗輸近的賽績唔覺太有代表性，充其量作腳。「好友緣」唔叻，要靠形勢做人，5檔則ok，邊線馬。

第6場　第四班（60-40分）1800米

　　愛蓮說確認進步，尤其上場在對面直路已要在三四叠蝕住跑，一樣蝕得起﹔轉到此程應更啱衝，如非9檔令其身處劣勢，有望勝回一仗。「電訊高星」 132磅點會冇壓力，近績唔錯才拖。

    　「好運得福」前仗入Ｑ，而剛賽退步，究竟係咪出閘稍慢影響晒，抑或前仗係符碌，今場會有進一步了解。「再度豪情」尊重近仗跑極都有，拖埋。「天鷹」對上兩季收咧前，都係對準此程搏，勿因上賽贏唔到便以為會縮槓。

第7場　第三班（80-60分）2200米

　　旺舖福星三連捷，氣勢夠銳，但來到此程係咪啱，真係兩睇。「勝利福星」上場大漏閘，點輸大家知，若然計番之前贏馬水準，在此唔會比下去。

   　 「印度光輝」有卡士卻冇谷草實戰經驗。「頭盤」及「正歡騰」若以剛賽陣上演出而言，前駒太早發力也只輸少少畀後駒，呢次唔係冇反先可能。「旺國手」長期得個「追」字，不宜博Ｗ，拖腳尚可。「威力高」唔係賺到盡，上場幾難有Ｑ。「好著數」明明近仗臨場行圈已見好，成績卻未交到，或因路程未配合，今次加程隨時變身。

第8場　第三班（80-60分）1200米

　　大衛精神跑到第二回合即現形，如果唔係直路畀對手擯過，影響到衝程，應該仲會輸近多少﹔嘗試加配件，如改善到早段慢腳問題，有埋1檔輔助，成績可再進。

    　「輕輕鬆鬆」肯放即於上場跑番好，今場3檔冇理由又會留啩﹖﹗

　　「活力至寶」11檔唔係無擔憂，希望克服到。「大進」擔心再跑此程會繼續追唔切。「心中有勁」重新開氣後回到此程，又忽然重戴眼罩，如跑得番與「美猴王」串Ｑ水準，8檔也不怕。

第10場　第二班（100-80分）1650米

　　雄風前仗贏馬水準唔失禮，唔係情緒波動的話，在二班亦唔使睇人面色，當然，捧場與否，要睇臨場係咪聽話。「愛跑得」近仗只要跑啱路程便可上名，明顯處當弗期。

    　「永勝多」往績穩定係賣點。「夢幻組合」有卡士，惜最近大閘唔算悅目。「幸福紅椒」沙田銀瓶唔啱路程，輸成點唔使介意，重返強項，再畀機會。「好兄弟」、「飛躍王子」唔反對做三重彩腳。「百贏萬歲」爭三班五名，只因一哩未係最合適。